សេចក្តីថ្លែងការណ៍របស់ក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា
ក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានចេញផ្សាយសេចក្តីថ្លែងការណ៍មួយ សម្តែងការព្រួយបារម្ភយ៉ាងខ្លាំង ចំពោះសេចក្តីរាយការណ៍តាមប្រព័ន្ធផ្សព្វផ្សាយជាច្រើន បង្ហាញថា ប្រទេសថៃបានផ្អាកការអនុវត្តសេចក្តីថ្លែងការណ៍រួម ដែលបានចុះហត្ថលេខាដោយនាយករដ្ឋមន្ត្រីនៃប្រទេសទាំងពីរ កាលពីថ្ងៃទី២៦ ខែតុលា ឆ្នាំ២០២៥។ សេចក្តីរាយការណ៍ទាំងនោះបានឱ្យដឹងថា ភាគីថៃបានលើកឡើងពីការផ្ទុះមីន កាលពីថ្ងៃទី១០ ខែវិច្ឆិកា ឆ្នាំ២០២៥ នៅក្បែរប្រាសាទព្រះវិហារ ដែលបានបណ្តាលឱ្យរងរបួសទាហានថៃពីរនាក់ ជាហេតុផលសម្រាប់ការផ្អាកការអនុវត្តសេចក្តីថ្លែងការណ៍រួម និងការលុបចោលគម្រោងដោះលែងយោធិនកម្ពុជា ១៨ រូប ដែលកំពុងជាប់ឃុំឃាំងនៅប្រទេសថៃ។
កម្ពុជាបដិសេធដាច់អហង្ការចំពោះការចោទប្រកាន់របស់ប្រទេសថៃដែលថា កម្ពុជាបានដាក់មីនថ្មីនៅតាមព្រំដែននោះទេ ដោយបានបញ្ជាក់បន្ថែមថា ចម្ការមីនភាគច្រើនតាមបណ្តោយព្រំដែនដែលបានបន្សល់ទុកតាំងពីសម័យសង្គ្រាមស៊ីវិលកម្ពុជាក្នុងទសវត្សរ៍ឆ្នាំ១៩៧០ និងឆ្នាំ១៩៨០ មិនទាន់ត្រូវបានបោសសម្អាតនៅឡើយទេ ដោយសារតែភូមិសាស្ត្រលំបាក និងស្ថានភាពមិនទាន់កំណត់ខណ្ឌសីមាព្រំដែន។ កម្ពុជាបានអះអាងជាថ្មីនូវការប្តេជ្ញាចិត្តរបស់ខ្លួន ចំពោះការអនុវត្តសេចក្តីថ្លែងការណ៍រួម និងសង្កត់ធ្ងន់ថា ក្នុងនាមជារដ្ឋភាគីនៃអនុសញ្ញាអន្តរជាតិស្តីពីការហាមឃាត់មីនប្រឆាំងមនុស្ស កម្ពុជាមិនដែល បានប្រើប្រាស់ ហើយក៏នឹងមិនប្រើប្រាស់មីនថ្មីឡើយ។
ក្រសួងការបរទេស និងសហប្រតិបត្តិការអន្តរជាតិ
